مزايا وعيوب السياحة في تركيا ونصائح هامه لكل
من يريد زيارة تركيا كسياحة
اقدر اقولك ان ده اكتر فيديو في اليوتيوب
هتلاقيه شامل لمزايا وسلبيات تركيا لانه من خلال تجربتي الشخصية واللي مش هبخل
عليكم فيه بأي معلومه او حاجه شوفتها بعيني في تركيا.
وزي مابيقول المثل ( إسأل مجرب ولا تسأل
طبيب )
بس حاجه مهمة ياريت تكتبلي رأيك في
الكومنتات لان كل رأي ليك بيفيد حد مسافر لتركيا وبنرحب بالاراء المحترمة البناءة
بإستمرار
بس
خليني اقولكم على حاجه بالنسبة لزيارة السياحة للناس اللي اول مره تروح تركيا
سياحة, مبدأياً انت هتواجه اصعب حاجه تواجه اي حد رايح سياحة لأي دولة وهي انك مش
هتكون عارف الاماكن كلها ومش هتعرف ترتب الفسح فلازم تعمل سيرش على النت قبل ما وتعرف
كل التفاصيل هناك. أوبنصحك تشوف شركة سياحه عليها فيدباك كويس لو بتبحث على النت
بس للأسف معظمهم بيزودوا في الفلوس.
بالنسبة للمزايا
- الاماكن
السياحية كتير وحلوه مش هتمل منها ومش هتلحق تخلصها وهتعوز ترجعلها تاني عشان تشوف
اللي مزرتوش وحتى عشان تزور نفس الاماكن تاني.
- الشعب ودود
جدا مش بتاع مشاكل مع السياح ودي ميزة هامة جداً في اي دولة تحب تروحها كسياحة
لانك مش رايح تدور على مشاكل وقلق في رحلتك او انك تلاقي صاحب البلد عنصري مع
السائح.
- لو عايز اي
حاجه او تهت بتلاقي الكل بيساعدك يعني ممكن توقف اي حد في الشارع تسأله وهيجاوبك
على اد ما يقدر.
- الاسعار
رخيصة للاكل وللتبضع ودي حاجه كل اللي بيروح تركيا بيشوفها وده طبعاً مقارنة
بالاسعار المرتفعه دلوقتي في كل العالم بس الغريب ان تركيا فيها اماكن رخيصة جداُ
في الاكل, اما بالنسبة للتبضع والهدايا ففي اصلا اسواق وبازارات مخصوصة هناك للهدايا
واللبس الرخيص زي سوق امينونو وسوق المصريين وغيرهم.
- بالنسبة
للمواصلات مش هتلاقي صعوبه حتى لو انت اول مره تروح تركيا لان كل مكان فيه مترو او
ترام او باصات, وكل مواصلة مكتوب فيها المناطق اللي رايحلها بس طبعاً انت بتحد رقم
الباص اللي هتركبة واللي بيروح المنطقة اللي انت عايز تروحها, وممكن تكتب في جوجل
ماب المكان اللي عايز تروحه وهيظهرلك المواصلة وارقام المواصلة اللي رايحالها يعني
الموضوع سهل جداً وانا كنت ماشي بجوجل ماب عادي بكل بساطة.
- في كارت
اسمه بطاقة اسطنبول وده كارت بتشترية فاضي تقريباً ب 5 ليرة وبتعبيه بالمبلغ اللي
انت عايزة عشان تركب الباص او المترو وهو رخيص بدل ماتركب تاكسي وهتعرف ليه متركبش
التاكسي في العيوب اللي هقولهالك.
- تركيا
تعتبر من اكتر الدول امان في العالم وده للبنات والاطفال, يعني ممكن اختك او زوجتك
او بنتك لو كبيرة تخرج وتشتري اللي هي عايزاة وترجع البيت من غير ما تقلق عليها
لان في امان كبير في البلد ده غير وجود الشرطة في كل مكان لان تركيا دولة سياحة في
المقام الأول.
- لو انت بقى
من اللي بيحبوا السهر واتوقع ده شئ اساسي لانك رايح سياحة مش رايح تاكل وتنام, هم
بيفضلوا في الشارع لوقت متأخر يعني هتلاقي بعض المحلات والمطاعم فاتحة لوقت متأخر.
- الجو بقى
هتلاقية رائع وهتستمتع بيع بالذات في الشتاء لان تركيا من الدول اللي بينزل فيها
التلج في كل المناطق ودي تعتبر حاجه جميلة اوي بالنسبة للدول اللي مبتشوفش التلج
زينا في مصر كده والكثير من الدول العربية ولو انت رايح في اول الشتا متقلقش
هتلاقي برضو تلج في منطقة بورصة اللي تعتبر من اجمل مناطق تركيا واللي لازم تزورها
وعمتاً انا برضو هقولك على المناطق اللي تزورها في فيديو تاني من خلال تجربتي
الشخصية.
- بالنسبة الفنادق
فهي كتير في كل تركيا لان زي ماقلنا ان تركيا دولة سياحية في المقام الاول ولازم
تكون كلها فنادق والميزة ان فيها الغالي والرخيص يعني هتلاقي كل الخيارات اللي
بتدور عليها وطبعاً انصحك انك تكون حاجز الفندق قبل ما تسافر عشان متروحش تدور
كتير بالذات لو معاك عائلتك, مع ان ده سلاح ذو حدين انك ممكن تحجز فندق متلاقيهوش
اد المستوى اللي انت عايزه بس بتحاول على اد ماتقدر تاخد الفيدباك اللي مكتوب مع
معلومات الحجز واللي بيكتبها الناس اللي قعدت قبل كده في الفندق ده, ونصيحه تاخد
بموضوع النجوم ده لانه فعلاً بيفرق في جودة الفندق.
- تركيا ليها
طابع اوروبي كده في الحياه وفي شكل ولبس الناس وشكل الطرق ونظافتها يعني هتحس انك
في دولة اوروبية لكن بطبع اسلامي محترم يعني مش هتكون مكسوف وانت ماشي مع مراتك او
بنتك انك تشوف حاجه مش حلوه في الشارع او تصرف غير متوقع زي دول اوروبا المنفتحة
زيادة عن اللزوم وبعض تصرفاتهم في الشارع لا تناسبنا كعرب ولو انت مسلم فإنت
هتلاقي مساجد كتير مش زي اوروبا.
-بالنسبة بقى
للعملة بتاعتهم الليره فهي واقعه يعني هتقدر تشتري حجات غير متوقعه بمبالغ قليلة
وده هيفيدك انك تقعد وقت اطول وتستمتع اكتر بالبلد, يعني ممكن نقول انك لو معاك
عيلتك ممكن تحتااج 3000 دولار في اسبوعين مثلاً وطبعاً كل واحد على حسب مصاريفه
واحتياجاته.
-بالنسبة
للناس اللي بيدوروا على استثمار او فتح مشاريع هناك فإنت لو معاك قرشين تقدر تفتح
مشروع هناك بسهولة وبشروط في المتناول وإن شاء الله هينجح لانهم بيشجعوا السياحة
والاستثمار بصورة كبيرة.
وعمتاً في فيديو تاني انا عاملة
لفيز العمل والاستثمار في تركيا وشروط وطرق الحصول على عمل في تركيا.
بالنسبة بقى للعيوب
- عيب مظنش
ان حد يتوقعه وهو انك نادر لو لقيت حد بيتكلم انجليزي منهم ايوه يا جماعه
متستغربوش هي دولة مش عربية اه بس محتفظين اوي بلغتهم حتى لو هي دولة سياحة ولازم
يتكلموا انجليزيى عشان عندهم سياح على طول, ممكن تعتبرة عدم تعلم في المدارس وممكن
تعتبرة كسل, ولو لقيت حد هيكون بيتكلم كلمه انجليزي وباقي الجمله تركي بس بتفهم في
الاخر هو عايز يقولك ايه بالاشارات او بالفهلوة.
يعني انت لو بتتهته في الانجليزي
اعرف انك بالنسبالهم برنس, بس حل النقطة دي انك بتستخدم مترجم جوجل مع اللي بتتكلم
معاه وتخليه يكتبلك وانت تكتبله, ومتستغربش هتلاقي الموضوع ده بيحصل كتير هناك
وطبعاً حصل معايا كتير وكنت بستغرب في الاول بس طلعت دي الوسيلة السهلة للتواصل مع
اي حد مبيعرفش انجليزي هناك.
- وده
بياخدنا لعيب مهم وهو الشغل هناك للأسف صعب انك تشتغل هناك لانك لو مش معاك لغة
تركيه مش هتعرف تتواصل مع الناس هناك ولا هتعرف تبيع وطبعاً اي حد راح تركيا يعرف
ان حتى العرب اللي هناك بيتكلموا تركي لدرجة اني مكنتش بعرف اللي بيكلمني ده عربي
ولا تركي, وطبعاً زي مانتو عارفين اننا كعرب تأثيرنا قوي فهتلاقوا برضو تراكوه
بيتكلموا عربي, فلازم عشان تشتغل هناك يكون معاك عربي لانها دولة سياحية اكتر
سياحها من العرب ويكون معاك لغة تركيةعشان تتقبل في الشغل, بس في نقطة هنا انك لو
تعرف حد يشغلك في اي شغلانه ومع الممارسة والاختلاط بتتعلم التركي.
- تركيا
تعتبر من الدول اللي عايشة على جبال يعني هتلاقي وانت ماشي هتلاقي جبال كتير وممكن
تكون انت اصلاً ساكن على تل زي ماحصل معايا , ةمش معنى انك ساكن على تل يعني فوق
الجبل مثلا لا انت لما تمشي في الشارع هتحس انك بتمشي لفوق شويه او بتنزل بسرعه
شوية, فإنت اعمل حسابك لو ساكن في منطقة كده انك هتعمل رياضه جامده لسمانة رجلك.
-اكتر عيب
ملحوظ وكل الناس هتحذرك منه مش السرقة مثلا لا التاكسيهات, هتلاقيهم مبيشغلوش
العداد للسياح حتى لو انت طلبت منه هيقولك لا مبشغلوش وبالذات لو انت في مكان
مقطوع او بليل متأخر ومش عارف تركب باص وكمان هتلاقيهم استغلاليين وغاليين فإنت
لازم تكون عامل حسابك لو هتركب مترو او باص انك تكون معبي الكارت بتاع المواصلات
او في برنامج زي اوبر بس خاص بتركيا اسمه ( Bi Taksi ) تنزلة
هيكون ارخص شوية من التاكسي ودي خدمة للمتابعين محدش هيقولكم عليها, وانا شخصياً
كنت بستخدمة لما مكنتش معبي رصيد في كارت الباص.
- بص بقى لو
ناوي انك تخرج من الساعه 6 ل 9 وتركب تاكسب اعمل حسابك انك الوقت ده من اكتر
الاوقات زحمة في تركيا وبالأخص اسطنبول ولو قررت تركب تاكسي في الوقت ده هيكون
الضعف فخليك دايماً بالباص وهتلاقي ناس كتير بتركبه عادي خالص وقريب منك وزي
ماقلتلك جوجل ماب هيعرفك اماكن الباصات القريبة منك. ( يعني بمعنى اصح خليك مع
جوجل ماب وجوجل ترانسيليت )
- من العيوب
اللي دايقتني فعلاً اني فعلاً كنت بتسمع صوت الاذان بس للأسف مكنتش بلاقي اي مسجد
قريب من الفندق وده في اكتر من فندق قعدت فيه لان تقريبا المساجد بتكون بعيده عن
الفنادق والله اعلم بس ده اللي انا واجهته كتير لدرجة اني عشان اروح اصلي الجمعه
مشيت نص ساعه تقريباً مع اني في اسطنبول يعني كل السياح هناك والمفروض ان كل حاجه
متوفره قريب منك.
- الموقف بقى
اللي اتعرضت ليه واتفاجئت بس عرفت بعد كده ان في بعض الدول فيها العيب ده وهي
عربانه المطار, عشان تاخد عربانه تحط عليها الشنط لازم تدفع تقريبا 7 ليرة وفي كاش
او فيزا عادي ( عمار يا مصر )
- اهم حاجه
عشان تتواصل مع اللي معاك لو عشان تمشي بالخريطة لازم تشتري خط موبايل اول ماتوصل
ودي من الحجات اللي لازم تعملها اول ماتوصل ويفضل كمان في المطار, في محلات
الموبايل بتوفر خطوط بفترة زمنية معينه اتوقع ده هينفعك لو انت قاعد فتره معينه في
تركيا.
- لو انت مش
من هواة الشتا فلازم تعمل حسابم في لبس تقيل لان الشتا على اد ماهو حلو ونظافة
البلد مبتخلكش حاسس بيه بس لازم تتقل في اللبس عشان متعياش انت او عائلتك وتبوظ
الرحلة.
- بعض
المحلات بتقفل ٨ على حد علمي بس انت بتعرف ايه المحلات دي من خلال قعدتك وهتلاقي
محلات تانية فاتحه عادي بس لازم تعمل حسابك في النقاطة دي لو بتدور على حاجه معينه
عايزها.
- الحاجه
اللي لفتت نظري بس هي مش بكثرة هي لبس البنات وجرأة الولاد والبنات تحس انك قاعد
في اوروبا بس مش كتير بس قلت برضو الفت نظركم ليها مع انها زي ماقلتلكم مش كتير.